Мамлекеттик мүлктү башкаруу боюнча мамлекеттик агенттиктин директору Тимур Малбашев мунай заводдун модернизациялоо иштери менен таанышты. “Кыргызнефтегаз” ачык акционердик коому башкармалыгынын төрагасы Нургазы Нишанов менен «Кыргыз Петролеум Компани» жабык акционердик коомунун президенти Байгазы Матисаков модернизациялоо жумуштарынын жүрүшү тууралуу маалымат берди.Бүгүнкү күндө жер иштери дээрлик аяктаган. Учурда фундамент куюу жумуштары, болот резервуарларды монтаждоо, технологиялык блоктор үчүн негиз даярдоо иштери жүрүп жатат. Подрядчы тарабынан жабдууларды сатып алуу жана даярдоо иштери аткарылууда. Курулуш-монтаждоо жана инженердик иштер графикке ылайык жүргүзүлүүдө. Масштабдуу модернизациялоо аяктагандан кийин, завод АИ-92 жана АИ-95 маркасындагы бензинди, ошондой эле Евразия экономикалык биримдиктин К-4 жана К-5 экологиялык стандарттарына жооп берген дизелдик күйүүчү май өндүрүлөт. Каржылоо булактары үч тараптан каралган. Кыргыз Республикасынын Финансы министрлигине караштуу Финансылык кредиттик фонду, «Кыргызнефтегаз» ачык акционердик коому жана чет элдик инвестор SPEC Engineering Inc компаниясы тарабынан. Заводду модернизациясын аягына чыгаруу мөөнөтү келишим боюнча 2027-жылдын соңуна пландалган.