Жалал-Абад шаарындагы мунайды кайра иштетүүчү «Кыргыз Петролеум Компани» жабык акционердик коому алты айдын жыйынтыгын чыгарды. Директорлор кеңешинин жыйынында компания президенти Байгазы Матисаковдун берген маалыматына ылайык, ишкана жарым жылдыкта өндүрүштүк тарыхындагы эң жогорку көрсөткүчкө жетишип, 313 миллион 587 миң сом өлчөмүндө таза киреше тапты. Бул 2024- жылдын алты айына салыштырганда 138 миллион сомго көп. Компания жетекчиси кирешенин көбөйүшүн даяр продукцияларды сатуу көлөмүнүн өсүшү менен байланыштырды жана толлинг кызмат көрсөтүү боюнча жүргүзүлгөн иш мерчемдин натыйжасында олуттуу киреше алып келди деди. Директорлор кеңеши көрсөткүчтөр чоң жетишкендик экенин айтып, бул өз кезинде эффективдүү башкаруунун жыйынтыгы деп баалады. «Кыргыз Петролеум Компани» 6 айда жалпысынан 116 миң 747 тонна чийки затты кайра иштетти. Негизинен заводдун кубаттуулугу жылына 500 миң тонна нефтини кайра иштетүүгө жетет. Бүгүнкү күндө ишканада 220дан ашуун кызматкер эмгектенет.