“Кыргыз Петролеум Компани” жабык акционердик коому 2024-жылдын жыйынтыгын чыгарды. Ишкана өндүрүштүк тарыхындагы эң бийик көрсөткүчкө чыкты. 305 миллион 497 миң сом таза киреше алып, 2023-жылга салыштырмалуу 20 миллион сомго көп киреше тапты. Директорлор кеңешинин кезектеги жыйынында компания президенти Байгазы Матисаков өткөн жылга коюлган план, иш жүзүндө аткарылган фактыларга токтолду. Чийки мунай затты кайра иштетүү көлөмү көбөйгөнү белгилүү болду. 2024-жылы нефтини кайра иштетүү 220 миң тоннага чыкса, 2023-жылы 213 миң тонна болгон. Директорлор кеңешинин жыйынына “Кыргызнефтегаз” ачык акционердик коому башкармалыгынын төрагасы Нургазы Нишанов катышып, ишкананын өндүрүштүк жана экономикалык көрсөткүчтөрү боюнча кеңири маалымат алды. Жетишкендиктер мыкты экенин айткан Нургазы Нишанов, компания өнүгүү жолуна түшкөнүн баса белгилеп өттү. “Кыргыз Петролеум Компани” өткөн жылга инвестиция салуу боюнча коюлган планды ашыгы менен аткарууга жетишкен. 2024-жылы 36 миллион 963 миң сом пландаса, иш жүзүндө 37 миллион 262 миң сом инвестиция жумшалган. Компанияда бүгүнкү күндө 220 дан ашуун кызматкер эмгектенет. “Кыргыз Петролеум Компани” Жалал-Абад облусундагы мамлекетке ири салык төлөөчү ишкана болуп саналат.